Huge ville ut i felten for å lære meir

Huge ville ut i felten for å lære meir 

Huge Wieldraaijer frå Stryn kjende at han ville lære på ein annan måte. Ikkje berre sitje med teori i eit klasserom, men kome seg ut i arbeid, stille spørsmål og prøve seg fram.  

Det får han gjere som superlærling hos Fjord Miljø på Nordfjordeid. 

– Eg valde å bli lærling fordi eg følte eg hadde meir å lære ute i arbeid enn på skulebenken, seier Huge. 

Fjord Miljø lagar teknologiske løysingar for betre fiskevelferd i oppdrettsnæringa. For Huge var det spennande av fleire grunnar. Bedrifta er lita nok til at han får vere ein viktig del av laget, samtidig som dei jobbar med innovasjon i ei næring med store biologiske utfordringar. 

Som superlærling står han ikkje på sidelinja. Han får vere med, kome med eigne forslag og lære kva som må til for at teknologien skal fungere ute hos kundane. 

Når noko må løysast raskt 

Noko av det Huge likar best, er å få bidra når det dukkar opp problem som må løysast der og då. 

For nokre månader sidan oppstod det ei utfordring der fisk kunne setje seg fast i eit produkt ute i merda. Dei hadde ikkje tid til lange prosessar. Dei måtte raskt finne ei løysing som fungerte, og som samtidig kunne brukast i framtidige leveransar. 

– Når det brenn på dass ute hos kundar, må ein tenkje utanfor boksen, seier Huge. 

Det er slike situasjonar som gjer at han trivst. Her får Huge bruke både hovudet, hendene og nysgjerrigheita si, og han får sjå korleis små justeringar kan ha mykje å seie. 

Teknologi som gjer det betre for oppdrettsfisken 

Eit av dei mest spennande prosjekta Huge har vore med på, var ein leveranse til ein brønnbåt som behandlar mot lakselus. 

Fjord Miljø leverte eit produkt som heiter DCP. Det løyser oksygen inn i merda under behandlinga, slik at fisken har nok oksygen før han skal inn i båten. Dei leverte også styringa og integrerte alt i systemet som allereie var der. 

For Huge var det kjekt å sjå at det dei laga, bidreg til betre fiskevelferd. 

Det er kanskje nettopp her mykje av motivasjonen ligg. Teknologien er ikkje berre noko som står på ein skjerm eller i eit verkstadlokale. Den skal brukast i ei næring der både folk, fisk og produksjon er avhengige av at ting fungerer. 

Å vere ein svamp 

Då Huge starta, kunne han lite om oppdrettsnæringa. Difor bestemte han seg for å suge til seg mest mogleg. 

– Eg har prøvd å vere ein svamp, seier han. 

For Huge betyr det å vere nysgjerrig, stille mange spørsmål og ta til seg det han lærer undervegs. Han ventar ikkje på å få alt forklart. Han spør, prøver, lyttar og lærer vidare.  

Og det har vore mykje å lære. 

Innan teknologi har han særleg lagt merke til kor viktig det er å gjere ting enkelt. Oppdrettarane har nok å gjere frå før. Difor må utstyret vere lett å bruke, lett å forstå og intuitivt i ein travel arbeidskvardag. 

Kjekt å bli kjend med nye folk

Som superlærling er Huge ein del av eit større fellesskap. 

Han møter lærlingar frå ulike fag og stader i Nordfjord, og kjenner at det sosiale betyr mykje. På Kompani Nordfjord var han lagleiar. Det gav han eit lynkurs i samarbeid, ansvar og leiing. 

– Det var utruleg kjekt å jobbe som lag med folk eg ikkje kjende frå før. Ein blir raskt godt kjend, seier Huge. 

Også på arbeidsplassen betyr miljøet mykje. I Fjord Miljø er det rom for humor, og Huge opplever at ein kan seie det ein meiner utan å vere redd for kva andre tenkjer. Dei har sosiale arrangement utanom jobb, og fleire trenar saman om morgonane. 

Tre veker i Polen

Som superlærling har Huge fått reise ut av landet. Nyleg var han tre veker på hospitering i Polen, der han fekk sjå korleis ei større bedrift jobbar med produksjon, rutinar og arbeidsmiljø.  

– Det er alltid kjekt å sjå korleis folk jobbar i andre land med anna språk og kultur, seier Huge. 

Bedrifta har rundt 160 tilsette og produserer mykje sjølv, frå kretskort til tavler. For Huge var det inspirerande å sjå korleis dei hadde bygd opp produksjonen, og kva dei gjorde annleis enn heime i Nordfjord. 

Erfaringane tek han med seg tilbake til Fjord Miljø, særleg når det gjeld rutinar, produksjonsmetodar og små grep som kan gjere arbeidet endå betre. 

For deg som likar å finne ut av ting

Huge er ganske bestemt på at han vil jobbe med teknologi dei komande åra. 

Han meiner fleire unge bør vurdere lærlingvegen, spesielt viss dei likar teknologi, problemløysing og det å finne ut korleis ting fungerer. 

Rådet hans er enkelt: 

Har du moglegheit til å vere med på arrangement som First Lego League, så grip sjansen. Det kan tenne ein flamme du ikkje visste du hadde. 

Og viss du likar å lære ved å gjere, spørje, teste og prøve deg fram, kan lærlingvegen vere ein god stad å starte. 

Her kan du lese meir om korleis det er å vere Superlærling!