Lærling med fingrane i framtidas oppdrettsnæring

Eg heiter Huge, er 18 år og kjem frå Stryn, men har budd på Eid sidan eg starta i Fjord Miljø. Eg valde å bli lærling fordi eg følte eg hadde meir å lære ute i arbeid enn på skulebenken. Fjord Miljø var attraktivt fordi det er ei lita bedrift der ein utgjer ein større del av laget, og fordi det er spennande å jobbe med innovasjon i ei næring med store biologiske utfordringar.

Korleis opplever du å bli tatt på alvor og få bidra?

Det er kjekt å få bidra med eigne løysingar. Ein kjenner det best når det brenn på dass ute hos kundar og ein ikkje kan vente på leverandørar – då må ein tenkje utanfor boksen. For nokre månader sidan oppstod eit problem der fisk kunne sette seg fast i eit produkt ute i merda. Då gjeld det å raskt finne ei enkel løysing som både fiksar problemet og kan brukast på framtidige leveransar.

Kva er det mest spennande prosjektet du har vore med på?

Ein leveranse til ein brønnbåt som behandlar mot lakselus. Vi leverte eit produkt som heiter DCP – det løyser oksygen inn i merda under behandling, slik at fisken har nok oksygen når han skal inn i båten. Vi leverte styringa òg, og integrerte alt i det eksisterande systemet. DCP-ane har vore ein stor suksess, og det er kjekt å sjå at ein bidreg til betre fiskevelferd.

Kva er det viktigaste du har lært?

Før eg starta var eg heilt blind på oppdrettsnæringa, så alt har vore viktig. Eg har prøvd å vere ein svamp – stilt mange spørsmål og tatt til meg det eg lærer. Innanfor teknologi har eg lært at ein må standardisere og forenkle. Oppdrettarane har nok å gjere frå før, så utstyret må vere lett og intuitivt å bruke.

Kva inneber det å vere superlærling?

Når eg snakkar med lærlingar frå andre opplæringskontor, har dei eit heilt anna forhold til kontoret sitt. Som superlærling er ein del av eit fellesskap – nesten som ein stor familie – og treffer lærlingar frå ulike fag og stader.

Korleis har Kompani Nordfjord og dei sosiale samlingane bidrege?

På Kompani Nordfjord var eg lagleiar. Det ga meg eit lynkurs i kva som skal til for å vere ein god leiar. Det var utruleg kjekt å jobbe som lag med folk eg ikkje kjende frå før, og ein blir raskt godt kjend.

Korleis er arbeidsmiljøet i Fjord Miljø?

Eg trivst godt med gjengen. Det er alltid rom for humor, og ein kan seie det ein meiner utan å vere redd for kva andre tenkjer. Vi har ein del sosiale arrangement utanom jobb – konsert i februar, grillfest til sommaren og fjelløp i september. Tre av oss trener saman om morgonane òg. Det har vore artig å styrkje relasjonane på fritida.

Du er no på tre vekers hospitering i Polen. Korleis har det vore?

Det er alltid kjekt å sjå korleis folk jobbar i andre land med anna språk og kultur. Bedrifta har om lag 160 tilsette og er opptekne av at alt skal vere "made in Poland" – dei produserer nesten alt inhouse, frå kretskort til tavler. Det har vore fascinerande å sjå, og har allereie gitt meg inspirasjon til korleis vi kan tenkje rundt produksjon heime.

Kva håpar du å ta med deg tilbake?

Hovudfokuset mitt er å sjå på rutinar, produksjonsmetodar og arbeidsmiljø, for å plukke opp gode ting som kan implementerast heime. Om ein trur nordmenn er innadvendte med framande, tar polakkane det til nye høgder – og dei fleste snakkar lite engelsk. Men etter eit par dagar med litt grunnleggjande polske ord, går det heilt fint.

Kva er framtidsplanane dine?

Eg er ganske bestemt på at eg skal jobbe med teknologi dei komande åra. Oppdrettsnæringa treng teknologisk innovasjon, så det er ikkje utenkjeleg at eg held fram der ei stund til.

Kva vil du seie til unge som vurderer å bli lærling innan teknologi?

Eg anbefaler det på det sterkaste. Skal vi ha teknologisk innovasjon i samfunnet, treng vi folk som interesserer seg for teknologi. Har du moglegheit til å vere med på arrangement som First Lego League, så grip sjansen – det kan tenne ein flamme du ikkje visste du hadde. Og akvakulturen har nok av problem som ikkje lèt seg løyse på ein-to-tre, så har du interesse for teknologi og problemløysing, er det berre å slenge seg med.

Her kan du lese meir om korleis det er å vere Superlærling!